Wergera Helbesta Annabel Lee

ANNABEL LEE

Beriya salan û salan bû,

Li welatekî ber behrê

Keçikek hebû belkî hûn ê bizanibin

Bi navê Annabel Lee,

Ji xeynî hatin hezkirin û hezkirina min

Tu hizira wê tinebû.

Ez zarok ew zarok,

Li wî welatê ber behrê,

Me, bi evîndariyekê ji evînê zêdetir ji hev hez kir

Ez û Annabel Lee,

Firîşteyên bibask ên bihuştê

Ji min û wê hesidîn.

Û ew yek bû sebeba me, beriya demeke dirêj,

Li wî welatê ber behrê,

Bayekî ji ewrê, efsirand

Bedewa min Annabel Lee,

Lêzimê wê yê zadegan hat

Û ew ji min bir

Da ku wê li gorê veşêre,

Li wî welatê ber behrê.

Firîşte, bi qasî nîvê me ne bextewar bûn,

Ji min û wê hesidîn,

Belê! Ev bû sebeb(wek ku her kes pê dizane

li wî welatê behrê),

Ji ewrê bayek hat bi şev

Efsirand û kuşt Annabel Leeya min.

Lê evîna me ji evîna wan bihêztir bû,

Ji evîna kesên ji me mezintir

Ji evîna kesên ji me hişmendtir,

Ne firîşteyên bihuşta asîmanê

Ne cinên binê behrê dikarin

Rihê min ji rihê Annabel Leeya bedew veqetînin.

Heya xeyala Annabel Leeya bedew neyne min

Hîv tu car nabiriqe,

Û stêrk tu car hilnayên

Heya ez çavên rewnaq ên Annabel Leeyê bibînim,

Û bi şev heya sibê radimedim li kêleka

Dildar-dildara min-jiyana min û xanima min

Li kêleka gora wê ya li ber behrê,

Li kêleka gora wê

Ya li ber behra ku deng vedide.

                       
                 

                       

                                       Edgar Allan Poe

                                       Werger: M. Bedirxan