Ez çi bêjim çi beyan kem
Mexfiyetan ez eyan kem
Sirê dilê aşkera kem
Kes bi halê min nezane
Çendî bêjim sir û halan
Ax ji destê çavxezalan
Her dinalim mah û salan
Kes bi halê min nizane
Mah û salan ez dinalim
Şev û roj talibwisal im
Aşiqê bejna şepal im
Kes bi halê min nizane
Aşiqê bejna letîf im
Xestehal im pir zeîf im
Mubtela qametelîf im
Kes bi halê min nizane
Mubtela qametfena me
Ji yar û dostan cuda me
Aşiqê nûra Xuda me
Kes bi halê min nizane
Aşiqê sêv û biha me
Ji bo cemala mubtela me
Ger bibînim canfeda me
Kes bi halê min nizane
Ew baxê sorgul di nêv da
Yar û mehbûb meşiyan tê da
Xweş e ji keyfa dinê da
Kes bi halê min nezane
Ew mehbûba wek stêra
Tasîra keça mîra
Te helandî Feqê Teyra
Kes bi halê min nizane
Feqiyê Teyran
Hiç yorum yok:
Yorum Gönder